मधेसखबर
वीरगञ्ज,भाद्र ५ गते । रौतहटमा नेपाल प्रहरीको बर्दीमै अर्केष्ट्रामा नाच्ने प्रहरी नायव निरीक्षक (सई) धनुषा गणमा तानिएका छन् ।
रौतहटको गढीमाई नगरपालिका वडा नम्बर ६ धरमपुरमा कृष्ण जन्माष्टमीको अवसरमा स्थानीयवासीले आयोजना गरेको एक कार्यक्रममा बर्दीमा रहेका प्रहरी नायव निरीक्षक (सई) शनिबार दिउँसो मञ्चमै पुगेर नाचेको भिडियो सामाजिक सञ्जालमा हाल भाइरल बनेको छ ।
प्रहरी आचरण विरुद्ध कार्य गरेको भन्दै जिल्ला प्रहरीले सईलाई आइतबार चौकीको ईन्चार्जबाट हटाएर अनुसन्धान थालेको हो ।
पदीय आचरण विपरीत सार्वजनिक स्थानमा अर्धनग्न नर्तकीहरुसँग नाचेको भिडियो सार्वजनिक भएपछि उनले संगठनको आचरण र मर्यादा विपरीत कार्य गरेकाले ईन्चार्जको जिम्मेवारीबाट हटाई कारबाही प्रक्रिया सुरु भएको जिल्ला प्रहरी कार्यालय रौतहटका प्रवक्ता प्रहरी नायब उपरीक्षक सुनिल मल्लले जानकारी दिए ।