Madhes Khabar
समाचार

ठगी तथा संगठित अपराधको कसुरमा दुई पूर्वमन्त्रीसहित ६ जना पक्राउ

काठमाडौँ,२मंसिर:ठगी तथा संगठित अपराधसम्बन्धी कसुरमा नेपाल प्रहरीले पूर्वमन्त्रीसहित ६ जनालाई पक्राउ गरेको छ ।

नेपाल प्रहरीको केन्द्रीय अनुसन्धान ब्युरो (सीआईबी) ले वैदेशिक रोजगारीका नाममा ठगी गरी गैरकानुनी रूपमा रकम संकलन गरेर मलेसिया पठाउने कार्यमा संलग्न रहेको आरोपमा उनीहरूलाई पक्राउ गरेको हो ।

पक्राउ पर्नेमा तत्कालीन श्रम, रोजगार तथा सामाजिक सुरक्षामन्त्री शेरबहादुर कुँवर र रामेश्वर राय यादव रहेका छन् ।

त्यस्तै, श्रम, रोजगार तथा सामाजिक सुरक्षा मन्त्रालयका तत्कालीन सचिव विनोद केसी, तत्कालीन रोजगार व्यवस्थापन महाशाखा प्रमुख (सहसचिव) उमेश ढुंगाना, राजीव पोखरेल र मन्त्रालयकी तत्कालीन कानुन अधिकृत (उपसचिव) निर्मला गुरुङ रहेका छन् ।

सीआईबीका अनुसार प्रधानमन्त्री तथा मन्त्रिपरिषद्को कार्यालय र वैदेशिक रोजगारसँग सम्बन्धित विभिन्न निकायबाट प्राप्त पत्र तथा विकास रनाभाटसमेतको जाहेरीका आधारमा उनीहरूमाथि अनुसन्धान अघि बढाइएको हो ।

नेपाल सरकार र मलेसिया सरकारबिच भएको समझदारी (एमओयू) विपरीत गैरकानुनी रूपमा ठगी गरी रकम संकलन गरिएको प्रहरीको भनाइ छ । संकलित रकममध्ये अमेरिकी डलर र बेलायती पाउन्ड गरी ठुलो परिमाणको रकम मलेसिया पठाउने निर्णयमा उनीहरू संलग्न रहेको आरोप छ ।

प्रहरीका अनुसार सम्झौताको दायरा र कानुनी प्रक्रियाविपरीत अधिकार क्षेत्र नाघेर विदेशी मुद्रा अपचलन गराइएको थियो । यसबाट देशको अर्थतन्त्रमा प्रतिकूल असर पर्ने निर्णय गरी संगठित समूहको लाभका लागि पद तथा जिम्मेवारीको दुरुपयोग गरिएको आरोप उनीहरूमाथि छ ।

कानुनी उपचार नगरी गैरकानुनी रूपमा संकलन भएको रकम मलेसिया पठाउने कार्यमा संलग्न व्यक्तिहरूलाई पक्राउ गरी अनुसन्धान गर्न काठमाडौं जिल्ला अदालतबाट मंसिर २ गते पक्राउ पुर्जी जारी गर्ने अनुमति लिइएको सीआईबीले जनाएको छ ।

उनीहरूलाई काठमाडौं, ललितपुर र सर्लाहीका विभिन्न स्थानबाट पक्राउ गरी थप अनुसन्धान भइरहेको प्रहरीले जनाएको छ ।

Related posts

सरकारले तोेकेको न्युनतम तलब पनि नपाएको पर्साका श्रमजिवी पत्रकारको गुनासो

MadhesKhabar

बार एशोसियसनको स्थापना दिवसमा वीरगन्जमा पनि निकालियो प्रभातफेरि

MadhesKhabar

निर्वाचन आयोगले भदौ १२ देखि मतदाता नामावली अद्यावधिक गर्ने

MadhesKhabar

Leave a Comment