वीरगन्ज,२६ कात्तिक : वीरगन्ज महानगरपालिका वडा नम्बर २२ मनियारीमा छठ पर्व मनाउने महिलाहरुलाई नयाँ साडी वितरण गरिएको छ ।पूर्वमन्त्री प्रदीप यादवको पहलमा रुंगटा वेयलफेयर सोसाइटीले छठ पर्वमा ब्रत गर्ने महिलाहरुलाई बिहीबार साडी वितरण गरेको हो ।
आर्थिक रुपमा विपन्न दलित तथा अन्य समुदायका ३ सय ५० जना महिलाहरुलाई जनही एक एक थान साडी र छठ पूजाको प्रसाद बनाउनका लागि दुई दुई केजी गहुँको पीठो वितरण गरिएको रुंगटा वेयल फेयर सोसाइटीका अध्यक्ष सुरेश रुंगटाले बताए ।
छठ पर्व केवल धार्मिक आस्थाको विषय मात्र नभई मानवीय सहयोग र सहानुभूतिको पनि पर्व भएको भन्दै उनले आर्थिक रुपमा कमजोर भएका समुदायका महिलाहरुसंग यो पर्वको खुशी बाँड्न पाउनु आँफुहरुका लागि गर्वको कुरा भएको बताए।
रुंगटा वेलफेयर सोसाइटीले सदैव समाजका विपन्न, असहाय र सहयोग आवश्यक व्यक्तिहरूका लागि यस्ता मानवसेवामूलक कार्य गर्दै आएको र आगामी दिनमा पनि यसलाई निरन्तरता दिने उनले बताए।
यसअघि गत मंगलबारपनि सोसाइटीले वीरगन्ज कारागारमा रहेका ६३ जना महिला कैदीबन्दीहरुलाई छठ मनाउनका लागि जनही एक एक थान साडी वितरण गरेको थियो ।