वीरगन्ज,१६असोजःनेपाली महिला राष्ट्रिय क्रिकेट टोली मलेसियासंगको टी–२० अन्तर्राष्ट्रिय सिरिजको पहिलो खेलमा ३ रनले पराजित भएको छ।
बिहीबार भएको खेलमा मलेसियाले दिएको १०५ रनको लक्ष्य पछ्याएको नेपालले पुरा २० ओभर खेल्दै ७ विकेटको क्षतिमा १०१ रन मात्रै बनाउन सक्यो।
मलेसियाको कुआलालम्पुरस्थित वायुमास ओभलमा भएको खेलमा नेपालले जवाफी व्याटिङ गर्ने क्रममा अन्तिम ओभरमा ७ रन चाहिएको अवस्थामा क्रिजमा रहेका कविता जोशी र राजमती ऐरीले ३ रन मात्र जोड्न सके ।
नेपालका लागि पूजा महतोले सर्वाधिक ३० रन बनाइन् । सम्झना खड्काले १८, कविता जोशीले अविजित १३ तथा कप्तान इन्दु बर्माले १२ रन बनाइन् ।
बलिङ्तर्फ मलेसियाकी नुर दानिया स्यादाले ४ ओभरमा १० रन मात्र दिएर ३ विकेट लिइन् । कप्तान विनिफ्रेड दुरासिंघम र आइसा एलिसाले २–२ विकेट लिए ।
त्यसअघि टस जितेर पहिले ब्याटिङ गरेको मलेसियाले २० ओभरमा ५ विकेट गुमाएर १०४ रन बनाएको थियो ।मलेसियाका लागि कप्तान विनिफ्रेडले सर्वाधिक २७ रन बनाइन् । अइना हमिजाले २६ तथा मास एलिसाले २५ रन बनाइन् ।बलिङ्तर्फ नेपालकी सोमु विष्टले २ तथा रुबिना क्षेत्रीले १ विकेट लिइन् ।सिरिजको दोस्रो खेल आगामी शनिबार हुनेछ ।